Mintegia deitu dugu kulturaren baitan ari diren hainbat elkarte biltzen dituen proiektua. Euskokultur Fundazioak duen ikuspegia egunerokoan gauzatzeko asmoz, bertan biltzen gara elkarrekin aritu ahal izateko eta elkarren berri izateko. Bakoitzak sortzen duen guztia ingurukoei era zuzenean helarazteko. Bertso, musika, kanta, dantza, goi mailako jakintza... horiek guztiek tokia dute gurean.
Bertsozale Elkarteak hemen du bulegoa, aretoan egiten ditu batzarrak eta bertan garatzen ditu bertso eskolak eta beste hainbat ekitaldi.
Kantuzaleen Elkarteak Mintegian du egoitza. Elkarteko kideek beren tokietan dihardute, baina fundazioko langileekin harremanak mantentzen dituzte.
Nafarroako Euskal Dantzarien Biltzarra ere partaide dugu Mintegian. Bulegoaren erabilera ez da egunerokoa, baina urtean zehar hainbat ekitaldi (hitzaldiak, batzarrak...) egiten du Aretoan.
UEUk egoitza du Mintegian eta mota orotako prestakuntza saio eta ikastaroak antolatzen ditu; haietako batzuk Euskokulturrekin elkarlanean.
Bereziki komunikabideen arloan eragiteko sortutako elkartea da; euskarazko ekoizpen, sorkuntza eta ekimenak bultzatzeko helburuarekin dihardu, eta gurean du bulegoa.
Txistularien Elkartea Mintegira etorri da 2017an eta egoitza gurean paratu. Elkartekideendako elkartzeko toki eta txistuzaleen edo txistuarekin loturiko guztiaren erreferentzia gune izan dadin nahi dute.
Mintegiko aretoa instalazio modernoa da, formatu txikiko edo ertaineko ekimenak gauzatzeko toki egokia.
Proiektu komun honetan gainerako elkarte edo taldeek parte har dezakete, partaide izan gabe. Izan ere, urtean zehar hainbat talde etorri ohi da hitzaldi, prentsaurreko, biltzar zein ikastaroak egiteko asmoarekin. Jar zaitez gurekin harremanetan ekitaldiren bat antolatu nahi izanez gero.
